Q4 Filipino - Sanaysay 1: Ang Pangarap kong Pamilya

Gumawa ng 2 sanaysay. Isulat sa isang formal theme notebook. Cursive ang pagsulat.

(Ang isinulat na sanaysay ay isa-submit po sa Marso 2015.)

Ang Pangarap kong Pamilya

Gusto ko sana na may mga kapatid ako. Kahit na may mga itinuturing akong mga kapatid, mas masarap pa rin na kasama, kapiling mo sila.

Sabi ng mga kaibigan ko na may mga kapatid, mahirap din daw ang may kapatid. Mas masaya daw kapag ikaw ang panganay.

Maraming nangyayari kapag may kapatid ka. Nagkakahiraman kayo ng mga bagay na mayroon kayo. Nagkakabiruan kayo. Nagkakausap kayo ng kung anu-ano. Nagsasalu-salo kayo kahit kailan at saanman. Sa isang pamilya ay hindi maiiwasan ang tampuhan o di kaya ay mga di-pagkakaintindihan. Pero kung may pag-ibig naman sa isa’t isa ang pamilya, di dapat patagalin ang mga tampuhang ito. Dapat na humingi agad ng kapatawaran at magpatawad.

Ang isa ko pang pangarap na pamilya sa buhay ay ang makasama ko lahat ng taong mahal ko o gusto kong makasama. Ang mga taong ito ang nagbibigay sa akin ng inspirasyon upang malagpasan ko ang mga hamon ko sa buhay at tumayo nang maayos upang hindi ako madalas madapa.

Ang aking pangarap na ito ay maaaring hindi mabuo agad-agad dahil sa mga limitasyon na mayroon sa mundo.

Ang isa ko pang pangarap ay isang pamilya na kung saan laging magulo – sa mabuting paraan. Isang pamilyang maingay at mahilig sa musika – dahil mahal ko ang musika.

Ang aking nukleyar na pamilya ay hindi “normal”. Binubuo ito ng dalawang miyembro lamang – ang aking ina at ako. Ang benepisyo ng pagkakaroon ng isang pamilya na ganito ay ang kalayaan namin bilang mga babae. Natututo akong gumawa ng mga simpleng gawain sa bahay. Masayang matuto. Ganito ang buhay ko bilang nag-iisang anak na walang kapatid o mga kahati sa buhay.

Kaya nga pangarap ko ang magkaroon sana ng mga kapatid …